صباح الخير عليكم جميعاً 🌿
موضوع اليوم باذن الله ثالث بوست من سلسلة رمضانيات ..🌙
مرة مبسوطة اني التزمت بهالفقرة والاحلى اني رجعت للمدونة بكل حماس وايجابية
فكرت كثير ايش ممكن اقدملكم ، وكان هدفي الاول يكون شي مختلف وخفيف في نفس الوقت ..❤️❤️
انا وحدة من الناس اللي اكررره اللغاويص الكثيرة في الطبخة وفي النهاية اطلع بكومة مواعين ههههه
>> اللي عندها غسالة صحون تخرج من الموضوع لو سمحتو هههه 😂
طبخة اليوم : سينابون مالح ، طبعا مافيه قرفه ههههه بس نفس الفكرة
شكل رول ويتقصص وفي النهاية سينابون بس طعمه بيتزا 😋❤️
مرة حلو انو تعملوه ويتقدم للضيوف في رمضان او غيره
بيتزا بس بشكل مختلف وانيق ومرتب ، ومتاكدة حيدهش ضيوفكم وحتدعولي ..
تبغو تعرفو الطريقة تابعو معايا لاخر البوست .. ❤️
ويلا نبدا ، بسم الله
المقادير :
صلصلة البيتزا ( ياتعملوها في البيت او تشترونها جاهزة حساب ماتحبو )
زيتون ، فلفل رومي مقطع مربعات ، جبن موزريلا
جبن سائل ، مايونيز
نفرد العجينة انا هنا استخدمت عجينة العشر دقايق ،
الافصل تكون ثقيلة ومتماسكة انا حقتي جات خفيفة فلغوصتني شوية وقت التقطيع ..
ندهن العجينة بجبن سايل و مايونيز
عشان يعطي شوية لذاذة للبيتزا يم يم 😍
بعد كذا نحط خلطة البيتزا ، والزيتون والفلفل الرومي وجبن موزريلا ،
حاولو ماتكثرو من خلطة ابيتزا عشان ماينكب عليكم وقت اللف ..
بكذا صارت الحشوة جاهزة للف ، وهنا تبدا المعاناة ههههه
تتلف على شكل رول ، حتتعكر معاكم كثير وقت اللف بسبب الحشوة
بس حاولو شوية شوية الين تتلف تمام ..
بعد كذا تتقطع دوائر ، حسب المقاس اللي تحبو ،
انا قصيت بحجم اصبعين ..
نجيب صينية وندهن بزيت ونرص السينابون
ونحاول نبعدها عن بعض عشان لما تنتفخ ماتتلصق في بعض ...
وبكذا صار السينابون المالح جاهز يتزين بحبات فلفل رومي وبالعافية عليكم ..
<< بالنسبة لية المرة الثانية حخلي العجينة متماسكة اكثر عشان لما اقصها ماتتلخبط معايا
وانتو كمان سوو كذا .. ❤️
اذا حبيتو طبخة اليوم .. ❤️
من سلسلة رمضانيات لعام ٢٠١٧ تشرفني تعليقاتكم اسفل البوست
واقترحولي طبخات نفسكم اسويها .. ✨
الى اللقاء في بوست قادم باذن الله ...👋🏼❤️
للتواصل :
لمشاهدة قناتي علي اليوتيوب اضغط هنا
الرجاء الاشتراك في القناة ❤️
snapchat : i_iafnan
instagram : i_iafnan
email : i_iafnan@hotmail.com
تسلم يدك مرا شي حلوو وانتي حلوه كمان 😻
ردحذفالله يسلمك ، ❤️
حذف