صباح الخير ..❤️
هالفترة ماشاء الله اشوف كثير بسناب وانستقرام بيعملو مكرونة بالقصدير
بوصفات مختلفة ونكهات متنوعة ..
وقلت ليش مااسوي انا كمان واشاركم تجربتي .. وفعلا طلعت لذيييذة مرة
مو عارفة هوا السر بالوصفة ولا بالقصدير هههههه 😁
بس منجد دايما اعمل الوصفة دي وماعمرها طلعت بذي اللذة والنكهة اللي بالقصدير
وحقيقة وصفة سهلة وبسيطة وماتحتاج صحن تاكلي فيه هههه
فاذا حابين تعرفو الطريقة تابعو معايا 😋👌🏼
المقادير :
روبيان بدون ذيل مغسول ، بطاطيس مقطعة مربعات
بصل مفروم ، ثوم مهروس ، صلصة طماطم ، جبن سايل
مكرونة اي نوع موجود ، كريمة طبخ
البهارات :
ملح ، فلفل اسود ، بابريكا ، ورق ريحان ، بودرة ثوم ، بودرة بصل ، كاري
نسلق نصف علبة المكرونة بزيت زيتون وملح
في صاج نشوح بصل وثوم ولما يذبل نضيف الروبيان والبطاطيس
نضيف البهارات المذكورة اعلاه ونص كاس مويا ، ومن ثم نغطي على الصاج الين ينضج الروبيان تماما ❤️
بعد ماينضج الروبيان والبطاطيس
نضيف كريمة الطبخ ، ملعقتين كبار جبن سايل ، نصف علبة صلصة الطماطم
نمزج المكونات تماما ومن ثم نغطي على القدر الى ان يتسبك
واذا ثقل ضيفو شوية مويا بس لاتكثرو ويصير مرة سايل ..❤️
بكذا صار الصوص جاهز تمام ، يمي يمي اشتهيته وانا اكتبه ههههه 😂
نجيب صينية ونحط فيها قصدير بذا الشكل وبعدها نصفي المكرونة من المويا
ونحطها على القصدير ❤️
بعدها صوص الروبيان والبطاطيس بنفس الشكل كذا بعدين في الفرن هي بتتمازج ❤️
بعدها جبن الموزريلا واذا عندكم بارمزان ضيفوها انا عني ماحبها ابدا
وكثرو جبن يمي يمي 😍❤️
بعدها نقفلها تمام عشان مايتسرب الصوص من القصدير وقت الطبخ في الفرن
احرصو على دي النقطة حتى لو اضطرتو تغلفوها بقصديرين .. ❤️
ندخلها في الفرن من فوق وتحت حوالي ١٠ دقايق الى ربع ساعة
كذا شكلها بعد ماطلعت من الفرن ، الريحة شي والطعم شي ثاني
من جد انصحكم تطبقوها جداا لذيذة .. وبالعافية مقدما ❤️✨
زووووم 😫❤️
واخيرن انتهينا من البوست ..🍝
اتمنى عجبكم بوست اليوم وان شاء الله تطبقوها وتعجبكم
اتذكروني وقتها وادعولي بالخير هههه 🙊❤️
اشوفكم باذن الله بَ لقاءات ثانية قريب
الى اللقاء 💋👋🏼
للتواصل :
لمشاهدة قناتي علي اليوتيوب اضغط هنا
الرجاء الاشتراك في القناة ❤️
snapchat : i_iafnan
instagram : i_iafnan
email : i_iafnan@hotmail.com
ليست هناك تعليقات:
إرسال تعليق