آلة القهوة نسبرسو ولا دولتشي قوستو ؟ | قهوة ☕️💕

مساء القهوة ونفحاتها اللذيذة ☕️💕
كثيير بسناب يسالوني عن التي سواء القديمة ( دولتشي قوستو )
او الجديدة اللي بالصورة امامكم ( نسبرسو ) >ع فكرة هذا حساب سنابي i_iafnan وكذلك الانتستقرام نفس الاسم

وانا من اشتريت الة نسبرسو وانا ناوية اكلمكم عنها واقولكم رايي 
بس حبيت اعطيها وقتها ودحين لي تقريبا ٤ شهور ماشاء الله من اشتريتها 
والحقيقة مرة مبسوطة فيها ..✨


لذلك راح يكون البوست لعدة اقسام 
اولا : مقارنة بين الة نسبرسو والة دولتشي قوستو 
ثانيا : مكونات الة نسبرسو وكيفية استخدامها 
ثالثا : اكثر الكبسولات اللي حبيتها وافضل حليب لها 

هذي صورة التي القديمة دولتشي قوستو لانو مالحقت اصورها 
فجبت الصورة من النت 
المهم اذا كنتي محتارة ايش تشتري نسبرسو ولا دولتشي قوستو 
اول حاجة شوفي انتي اي وحدة من الناس .. 
اللي تحب القهوة ونكهاتها المختلفة وقوتها !!
ولا اللي تحب تشرب مشروبات باردة وحارة ومرة تبي كابتشينو ومرة تبي شاي لاتيه ومرة موكا ومرة عصير بارد .. الخ

نبدا بدولتشي قوستو 👏🏽

دولتشي قوستو : كبسولاتها عبارة عن انواع مختلفة من المشروبات 
١- تسويلك كابتشينو وتجي العلبة فيها كبسولة قهوة وكبسولة حليب 

٢ـ تعمل مشروبات اخرى مثل شاي لاتيه ، موكا ، شاي مغربي ، اسبرسو ، وعصاير باردة

٣ـ طريقة استخدامها جدا سهلة مايحتجلها جهاز حليب لانو اصلا الكباتشينو بتجي معها كبسولة حليب

٤ـ استخدمتها اكثر من سنتين وجودتها ممتازة ماشاء الله 

٥ـ عيبها الوحيد انها شوي كبيرة ، مافيها مخزن للكبسولات المستخدمة زي نسبرسو 
يعني اخلص من الكبسولة الاولى حقت الحبيب اروح ارميها في الزبالة وارجع احطها كبسولة القهوة ولما تخلص اروح ارميها في الزبالة الله يكرمكم 
يعني شي متعب شوية

٦ـ اسعار الكبسولات في السعودية مشابهة لنسبرسو وكمية الكبسولة اكثر 
علبة الكبسولات حقت دولتشي قوستو فيها ١٦ كبسولة ونسبرسو ١٠ فقط مع العلم خارج المملكة اسعارها جدا رخيصة
بالاضافة لاتنخدعو باللي يبعو في الانستقرام اسعارهم مرة اوفر خذوها من الدانوب سعرها معقول .

٧ـ الحلو فيها كبسولة قوية ماتنطعج او تتغفص زي نسبرسو ومعاناة مع هالمشكلة لانها اذا انطعجت ماتستخدمها الالة فمحا استفيد منها 

٨ ـ سعرها مناسب اخذتها من امازون ب ٦٠٠ ريال مع التوصيل

٩ـ في زرين واحد للبارد وواحد للحار وفي ٧ احجام لكمية الكبسولة 

١٠ـ صناعة امريكية ومالها اي فرع في المملكة تلقونها بامازون او متاجر الانستقرام او ساكو والدانوب وغيرها

في النهاية بتقولي طيب يا فنو بتنصحينا فيها ؟ 
ارجع اقول حسب ميزانيتك وحسب رغبتك انتي 
اذا كنتي من عشاق القهوة والنكهات المختلفة وحدة القهوة المتنوعة مثلي
 ف افضلك نسبرسو
اما اذا مو كثير تحبي القهوة وتبغي الة كل مرة تسويلك شي على مزاجك
 اقولك دولتشي قوستو

طيب نجي لالة نسبرسو ايش مميزاتها 
١ـ حجمها خفيف وصغير مرة حبيتها 

٢ـ التنويع بنكهات القهوة مرة عاجبتني واحب كل مرة اجرب نوع بس الكبسولات قليلة مقارنة بسعرها١٠ كبسولات بحدود ٢٩ ريال الى ٣٣ ريال سعودي ، 

٣ـ فيها مخزن للكبسولات وهذا مرة ريحني عكس دولتشي قوستو 

٤ـ الجودة ماحسيتها بنفس سرعة دولتشي ماعرف ليش يمكن المشكلة في التي !!

٥ـ النوع اللي اخذتها من نسبرسو مرفق معاه جاهز للحليب وموجود عندهم جهاز الحليب ينباع لوحده كمان


٧ـ بالنسبة لحجم الكوب ممكن صغير وممكن متوسط اذا شلت القاعدة اللي تحت 
قاعدتها مغناطيس وهذا مرة عجبني 

٨ـ فيها ٣ خيارات لحجم القهوة والاستخدام باللمس ، مانصحكم باللمس تخرب بسرعة ، في  انواع مختلفة عند نسبرسو نصيحة لاتاخذو لمس 

٩ـ محلات نسبرسو لها فروع في المملكة تقدري تشتري منها عكس دولتشي قوستو الا مالها فروع هنا

هذا مخزن الكبسولات يشيل تقريبا ١٥ كبسولة ، ترمين الكبسولات منها وتغسلينها وترجعينها عادي

هذي صورة علوية لمخزن الكبسولات بعد الاستخدام 

علبة المويا بلاستيك ، كميتها مناسبة لانها بس تستخدم للقهوة 

الاختراع الجميل ، جهاز الحليب حجمها يسوي كوب واحد تقريبا 
تسوي حليب بارد وحار ، اذا ضغطتي الزر مرة يصير احمر ويسويلك حليب حار 
واذا ضغطتي مرتين يصير ازرق ويسويلك حليب بارد 

سخونته عادية والرغوة جميلة وحسب نوع الحليب

افضل حليب جربتو : المراعي ونادك 
ابعدو عن السعوية مايسوي رغوة ، وصافي الرغوة مرررة اوفر 

بعد ماسخنت الحليب بالالة ، الرغوة ماشاء الله ممتازة هذي بحليب المراعي قليل الدسم

لما اشغل الالة حقت الحليب للحار تصير نفس كذا ولما تخلص يطفي النور الاحمر 

اكثر الانواع اللي حبيتها .. 
اربيجو بدون كافيين 
اربيجو عادي 
داركان 
ليفانتو 
اندريا 

الجهة العلوية ل الة النسبرسو 
مدخل الكبسولة بالاضافة لثلاث احجام للقهوة باللمس انا استخدم عادة الاوسط 
الحجم الاكبر قهوة اكثر وحدة اخف 
الحجم الاوسط حدة وسط وكمية القهوة وسط 
الحجم الاصغر كمية القهوة قليلة بس الحدة قوية 

الكابتشينو افضل شي الوسط 
الاسبرسو افضل شي الصغير 

ندخل الكبسولة بنفس الطريقة كذا ونختار الحجم اللي نبغاه انا اخترت الوسط 
ونسكرها وتنزل القهوة تلقائيا في الكوب 

تقريب اوضح للكبسولة ..

احلى شي انها بتعمل رغوة للقهوة كمان

زووووم 

بعد ماسخن الحليب صبيتو ع القهوة ونزلت الرغوة بعدها 

وبكذا جهز الكابتشينو ، يمي وبالعافية 😋❤️

تجربتي مع كبسولات ستاربوكس ورويال وغيرها 
في صفحتي على اليوتيوب على الرابط هذا 

الحمدلله انتهيت من بوست اليوم 
ماتصدقو قد ايش استمتعت بتصوير البوست والكتابة وانا اتقهوى من نفس الالة
يعني شي احبو وكمان اتكلم عنو ياسلااام 😍
ان شاء الله اكون وفيت وكفيت ، ويكون مرجع لكل وحدة حابة تشتري الة قهوة 
اي استفسار او تعليق اكتبوه تحت البوست 👇🏼

الي اللقاء في بوست اخر ان شاء الله 💋👋🏼

للتواصل : 

لمشاهدة قناتي علي اليوتيوب اضغط هنا 

الرجاء الاشتراك في القناة ❤️

snapchat : i_iafnan

instagram : i_iafnan

email : i_iafnan@hotmail.com