صباح السكر ، والاجازات الجميلة 🙊💕
موضوع اليوم مقسمات جميلة تنفع للسفر اكثر شي وحتى للخرجات البسطة
عن نفسي فعليا استخدمتها وفادتني كثير
ترتب اغراضي وتحافظ عليها وعلى نظافتها ...
للي مهتمين بهذي المواضيع يكملو البوست معايا ✨
اول موضوع الشنط الصغيرة اللي في الصورة تجي باحجام واشكال مختلفة
والوان مرة جميلة وشركات كثيرة تنتجها ، وحقيقة الشنط الصغنننة دي بتفيدنا كثير ، حتى خامتها مختلفة ، والافضل اللي يجيك بلاستيك او نايلون عشان لو قدر انكب شي ماتعدم اللي داخل الشنطة او خارجها ،
افضل من القماش والجلد وغيرها
واسعارها اكيد مختلفة من شركة لشركة ، في براندات عالمية بتعمل منها وعليها اسم الماركة
وفي محلات صغيرة كمان بتجيب منها ، في النهاية الفايدة والشكل الجميل والجودة طبعا فوق كل شي ✨
بعضها تجي مفردة تشتريها بالحبة والبعض تجي مجموعة كاملة وهذي الافضل والاوفر
طيب ايش استخدماتها يافنو ؟؟ 👌🏼
الحجم الكبير استخدمها للمكياج ، ماشاء تشيل اغراض كثيرة
فمرة تريحني كل مكياجي اللي احتاجه احطه فيها مو بس في السفر حتى لما اروح عند اهلي
اجلس كم يوم احط مكياجي في دي الشنطة ، يعني كرفتها كرف ماشاء الله ومو باين عليها
من جوة قماش ومن برا زي البلاستيك يعني بحيث لو انكب شي مايدخل للشنطة ،، فعلا انصحكم فيها
بس عيبها كبيرة ماتنفع لشنطة اليد حلوة في شنطة السفر الكبيرة❤️
شوفو مقارنة حجمها بالايفون ، مرة حلو حجمها وناسبني ماشاء الله ❤️
الحجم اللي بعدو حلو لفرش المكياج ، ممكن بعض الادوية للسفر
اي حاجة ممكن تفيدك في السفر استخدمتها انا ك صيدلية مصغرة ههههه اكثر من فرش عشان اوفر شنط واغراض
واضفت الفرش مع شنطة المكياج وكفت الحمدلله 💕
ابد والله صورة تأملية هنا ههههه 😁
الحجم اللي اصغر خليتها للاكسسوارات ، ماحب استخدم اكسسوارات كثير
ف الحجم هذا ناسبني وخفيفة مرة تنحط بشنطة اليد كمان .. 🌿
الشنطة هذي اختراع فضييع وجميل ، شايفين العلاقة فيها او حسب ماتسموها
المهم انو تنحط فيها اغراض الحمام الله يكرمكم ، وتتعلق في الحمام ، مرة حلوة
تلم اغراضك كاملة بالاضافة انو تفيدك فالحمامات الضيقة او الصغيرة ، وتحافظين على نظافة الاغراض
وبرضو من برا بلاستيك عشان لو قدر الله اتكب شي ..
انا حصلي موقف مرة كان فندق من اللي سكنها صغير مرة فما في مكان حتى احط فرشة اسناني ، فمنجد حسيت بقيمة السنطة دي علقتها في الحديدة دي اللي يحطو فيها المناشف ومرة استفدت منها ..❤️
شايفين كيف شكلها ، تتعلق نفس كذا بشكل طولي وفيها جيوب وبسحاب ، تحطي فيها الاغراض عشان تضمني انو ماتطيح ..💕
عيبها الوحيد انو الاحجام الصغيرة تدخل فيها فقط ، يمكن الحجم اللي عندي صغير في اكبر ماعرف
بس بالنسبة لي اشوف حجمها مناسب ، تنحط فيها جميع احتياجاتك ( شامبو ، بلسم ، شو جل ، اعواد اذاني ، فوط نسائية ..الخ )
طبعا لاتشيلو حجم الاشياء الصغيرة كيف توفروها ، في اختراع مرة بطل شوفو الصورة اللي بعدها 😍👌🏼
اجمل اختراع ، العلب الصغيرة ، توفر عليك اغراض كثير بدل ماتاخدي احجام كبيرة من ادوات التنظيف
هذي افضل تقريبا ٥٠ مل وفي ١٠٠ مل الحجم اللي في الصورة ٥٠ مل
استخدمتها في السفر عبيتها وحطيتها في شنطة الحمام اللي فوق ومع هذا ماحتجتها كثير في السفر
لاني استخدم حقت الفنادق فكنت مخليتها احتياط ، بس مرة حلوة وفعلا انصحكم فيها
تجي معاها ورقة كاتبين فيها ايش ممكن تحطي في العلب ❤️
تجي علبتين طويلة وعلبة عصار ، وعلبتين صغار اللي في الصورة ، وملعقة غرف
العلبتين الطويلة حطيت فيها شامبو ، وبلسم والعصار شور جل
والعلبتين الصغار مخليتهم لكريم الشعر ، وكريم الجسم 💕
وعشان تفرقي بينهم تلصقي ورقة صغيرة وتكتبي عليها نفس الصورة ..
فعليا انصحكم فيها ..👌🏼
الاختراع الجميل ذا لفرش الاسنان ، من زمان نفسي في حاجة تحفظلي الفرشة عشان ماتتجرثم
ولقيت العلب دي وع طول اشتريتها مرة جميلة وتجي بلاستيك قوي
بحيث ماتنغفص او تنضغط و تحفظ الفرشة وتحميها .. ✨
هذي العبة حلوة لشنطة اليد ، تحطي فيها الادوية اللي تحتاجيها وممكن الشريحة اذا كنت بتاخذي شريحة من البلد اللي رايحتلو ، عشان ماتضيع
انا كنت حاطة فيها فيفدول ، فيتامين ، ادول ، حبوب للمغص ، وكمان الحبوب الصغيرة في الصورة
عبارة عن مطهر للفم مرة حلوة حبة وحدة تذوب في الفم وتكفي ..👏🏽
دي الاكياس مرة حلوة للملابس الوسخة في السفر اول ماشوفتها اشترتيها بس لما شفت احجامها انصدمت
اللي في الصورة اكبر حجم ، بس الحمدلله استفدت منها
حلو تحطي الملابس الوسخة اللي استهلكتيها في السفر بحيث تحمي الملابس النظيفة منها
وغير كذا نايلون بحيث مايوصلو اي شي مبلول .. مرة حبيتها بس اتمنيت تكون احجامها اكبر 🌿
تجي ٤ اقسام متقاربة في الحجم هذا اصغر حجم ، بحجم الايفون
برضو في حاجة نسيت اصورها مرة حلوة تجمع كل الاوراق والجوازات والبطايق
خسارة ماصورتها بس ان شاء الله حنزلها في موضوع ثاني عن السفر ..❤️
ان شاء الله يكون عجبكم بوست اليوم ، واهم شي انكم استفدتو 🙈
اذا في حاجة تعرفوها ماذكرتها اكتبوها تحت البوست عشان نستفيد كلنا
الى اللقاء في بوست اخر ان شاء الله 💋👋🏼
للتواصل :
للتواصل :
لمشاهدة قناتي علي اليوتيوب اضغط هنا
الرجاء الاشتراك في القناة ❤️
snapchat : i_iafnan
instagram : i_iafnan
email : i_iafnan@hotmail.com
تعرف الان على افضل فنادق كوالالمبور للحجز والسفر عن طريق شركة سفرك لخدمات الرحلات السياحية للعائلات فقط من خلال زيارة موقعنا لتجد افضل العروض من افضل فنادق تايلاند مع التمتع باقامة مميزة فى افضل جزيرة في المالديف تواصل معنا الان وتعرف على اهم الخدمات والعروض عبر موقعنا
ردحذفيمكنك الان التعرف على اسعار شنط مدارس اطفال بنات للحصول على اقوى الموديلات الحديثة بالاضافة الى خامات تصنيع شنط سفر باعلى جودة فقط اتصل بنا الان واطلب شنط دعاية قماش كما يمكنك الان الحصول على شنط هدايا ورقيه متميزة وبتصميمات متنوعة
ردحذف