رمضانيات 🌙 | طريقتي في عمل رولات التوست بالدجاج .

السلام عليكم ورحمة الله وبركاته ❤️

ماتصدقو قد ايش وحشني التدوين غبت فترة عنه وانا نفسي افضاله

بس للاسف انشغلت بالتطبيق العملي والحمدلله اتخرجت على خير 🎓 ❤️

حبيت اعملكم سلسة رمضانيات ،

 حنزلكم طبخات احتمال في الاسبوع مرة او مرتين حسب وقتي وقدرتي .. 

ووصفة اليوم جداا لذيذة حتدمنوها اكيييد 😍، صح قديمة ومكررة بس بطريقتي في تتبيلة الدجاج غيير

يلا نبدا ونقول بسم الله ✨

المقادير : 

دجاج صدور مفروم ، 

خضار ( فلفل رومي مقطع صغار ، جزر مبشور ، بقدونس )

توست مقطوعة اطرافه ومفرود على شكل شرايح

التغطية على الوجه :

ملعقتين اكل جبن سايل ، ملعقة اكل مايونيز ، علبة قشطة

جبن موزريلا ، بقسماط

البهارات :

فلفل اسود ، ملح ، بهارات فاهيتا ، بودرة زنجبيل ، كركم 

بابريكا ، بودرة بصل ، بودرة ثوم ، بودرة كاري

طريقة عمل الحشوة : 

١ - نحمس او نكشن بصل وزبدة سايلة واذا ذبلت نضيف عليها الفلفل الرومي 

٢ـ بعد مايذبل الفلفل الرومي وتطلع ريحته الشهية ههههه نضيف الدجاج المفروم والبهارات

٣ـ بعد مايستوي الدجاج نضيف الجزر المبشور والبقدونس ونتركها شوي لين تذبل ونطفي النار عنها

وبكذا صارت الحشوة جاهزة نتركها تبرد شوية عشان نحشيها في التوست

نضع قطعة التوست ونفرد عليها شوية جبنة سايلة ونركز على اطراف عشان تتماسك بعد ماتتلف ونضع بعدها كمية مناسبة

من الحشوة ونلفها على شكل رول وتلقائيا حتتماسك اللفة بسبب الجبن السايل

بعد ماخلطنا مقادير التغطية نضع كمية بسيطة منها على سطح الصينية 

ونرص بعدها رولات التوست المحشية دجاج

نحط الكمية الباقي من التغطية على وجه رولات التوست ونغطيها تماما 

بعدها نضيف جبن الموزريلا والبقسماط بالكمية اللي حابينها ولو تكثرو يكون افضل 

نضع الصينية في الفرن بدرجة حرارة ١٥٠ من تحت 

ولما تبدا تحمر من تحت ، نشغل اللي فوق بنفس الدرجة الى ماتحمر ويذوب الجبن المبشور 

وبكذا انتهينا من صينية رولات التوست بالدجاج ، و قطعوها وهي حارة افضل وبالعافية على قلوبكم مقدماً 💕

تعليقاتكم وارائكم وتجاربكم محل اهتمام عندي 

اتشرف فيها اسفل البوست ،، ❤️

القاكم في بوست اخر .. الى اللقاء 🌿

للتواصل : 

لمشاهدة قناتي علي اليوتيوب اضغط هنا 

الرجاء الاشتراك في القناة ❤️

snapchat : i_iafnan

instagram : i_iafnan

email : i_iafnan@hotmail.com