منتجات خلصتها ورجعت اشتريتها ! ✨

مساء الخير والهدوء والروقان 

مساء مايليق الا بمتابعيني .. 💋

فترة الاختبارات كل انواع الحماس يطلع هههه ومن زوده كتبت اكثر من موضوع

للمدونة ، ولا بعد تحمست اصور موضوع اليوم  😁🙊❤️

والحمدلله انتهت فترة اختباراتي اللي اول مرة تطول كذا معاي 

هالمرة حبيت اختار شي مختلف والاهم مفيد لكم .. 

المنتجات اللي موجودة في ذا البوست كلها جربتها واعطيتها حقها في التجربة 

وكلها استفدت منها يعني الموضوع ايجابي في ايجابي 🔐

تابعو معايا ياحلوييين .. 💕✨

اول منتج !

شامبو وبلسم الشعر من بانتين 

قد شوفت عليه مدح بس ماحطيته في عين الاعتبار ، اتجاهلت الموضوع 

ومرة اشتريت شامبو بانتين وعجبني حسيتو ناسب شعري يعني بعد ماخذ شور 

حتى لو ماحطيت بلسم لشعري احسه هاجد ههههه 🙊

حبيتو وصرت ماخذ غيرو لشعري ، وذاك اليوم خلص علية ولما رحت اشتري ع السريع

اخذتو وحطيتو في العربية ولا قرات اهم شي بانتين ويالله ههههه 

ولما جيت اخذ شور اعصر ع يدي واشوف كانو كريم خفيف انصدمت 😱 ايش هذا طالعت بالعلبة طلع بلسم

هههه ام الصدمة وقتها من فين لي دحين شامبو اتروش المهم دبرت نفسي بكلير للرجال 

واستخدمت البلسم دامي اشتريتو 

والصدمة الثانية انو البسلم طلع فضييييييع ، نعومة لشعري ورطوبة ومتماسك حسيت شعري

معاه غييير ، مررة ارتحت عليه وحطيتو من مفضلاتي وسرت استخدمهم دايما . 💕

نصيحة لطيفة : لاتستخمو اي منتج سواء للشعر او غيره دايما بدون ماتغيرو لانو 

حينقلب عكس بعدين ، لذلك اقطعي بين فترة وفترة باي منتج مختلف . 

وعن تجربة .. ❤️

ثاني منتج :

بلسم للشعر من ايف روشيه 

مو جميل اللي بعده كمان ههههه ❤️❤️

هذي ثاني علبة اشتريها من عندهم ، صح السعر مو رخيص بس يستاهل 

ماصرت استغني عنه الا لما لقيت بلسم بانتين وصرت مرة ذا ومرة ذا 

قوامه ثقيل توزعينه على شعرك وبعدها تغسلينه .. كمية النعومة والكثافة 

وفوق ذا ريحتو مقبولة ، يقولون انو علاجي يعالج تساقط الشعر وغيره ..

مادققت انا في ذا الشي ، بس لاحظت قبل فترة انو فعلا خف تساقط شعري بشكل ملحوظ

مادري هوا السبب منو ولا من الحمل هههه 

لذلك ماقدر اضمن لكم انو علاجي .. عندهم انواع كثيرة حسب مايناسب شعركم وايش تحتاجو

روحو وشوفو واختارو اللي يناسبكم . 💕

ثالث منتج :

بديل الزيت من لوريال .

امانة اجمل كريم لشعري استخدمتو ، تعبت وانا ادور شي يناسبني 

كل مرة اجرب وارمي واغير .. وشعري يتعدم معا المنتجات القديمة 

بس بعد لوريال شي ثاني ، ماصرت اعاني من تمشيط شعري بعد الشور هههه 

لانو الشعر الطويل متعب ماشاء الله ، لوريال خفف عني العبء ذا وحتى ريحتو حلوة 

خلص ورجعت اشتريت ثاني ولا اتوقع اني راح اغيرو .. لانو فعلا من بعدو ارتحت 

من ناحية شعري خصوصا بعد الشور . ✨

انصحكم فيه بقوة ، حتى صحبتي هنو تستخدمو وكانت تمدحو من قلب

من اجمل مفضلاتي ومستحيل اتركو الا اذا لقيت افضل منو ههههه

رابع منتج :

من اليسار نبدا عشان تسلسل الصور بس 😁💕

شور جل من برجوا ( او زي ماهم كاتبين منتج حليبي للاستحمام )  اللي صورتو لكم سناب قبل فترة ، المهم قبل فترة 

رحت السوبرماركت وابغى اخذ شور جل من جونسون امشي حالي فيه الين اشتري

من باث اند بودي ووركس ، وانصدمت لما شوفت حق برجوا عيوني صارت اربع ههههه

شفت له اتوقع ٣ انواع بدون تفاهم شميت روايحهم واخذت هذا اللي بالصورة حسيتو احلى

ولا كمان ب ١٤ ريال اتوقع يعني يابلاش ..❤️

تلقوه في بنده اخذته من هناك 

بس امانة لما استخدمتو ماحسيتو واو يعني اسمو شفعلو بس ، الريحة مميزة وشي جديد عليه

بس ماحسيت بانو ينضيف الجسم قوي زي باث اند بودي ووركس . 

كريم كولاجين للوجه ..

اصلا انتشر قبل فترة بين البنات والتاجرات .. وكمية المدح عليه 

امانة يستاهل ، جربتو لوجهي بعد ما امسح وجهي من الميك اب 

واقشرو بمقشر لطيف من هيلين في الصورة  اللي بعد ذي حتشوفو 

استخدم كريم الكولاجين احسو يغذي البشرة ويلطفها كانها بشرة بيبي 

وفوق ذا ريحتو تجنن ، واضح انو عندي مشكلة مع الروايح ههههه 🙈

حتى احس بشوية نظارة لبشرتي امانة ماستمريت عليه زي مايقولو قبل النوم تحطي منو 

بس كنت استخدمو بعد المقشر ، لانو المقشر صار يسويلي جفاف لوجهي وانا بشرتي عادية 

فالكريم ذا كان المنقذ .. ❤️❤️

تلقونو عند التاجرات وطبعا الاسعار حدث ولا حرج 

فالافضل تاخذونه من صيدلية اي هيرب  الامريكية ، انا اخذته من هناك يوصلون دايركت 

ع السعودية ، وسعره ارخص بكثير من التاجرات .. 💕

خامس منتج :

مقشرات الوجه واقنعة من كوين هيلين 

عندي منهم ٣ منتجات ، قناع للوجه بالنعناع يستخدم في الاسبوع اكثر شي مرتين ينقي البشرة وينظفها من قلب 

واصلا بعدها تحسي بجفاف في بشرتك ، احسو افضل بكثير من حوسة الطين الاوروبي تعصرين منه في اصباعك

وتوزعينه على وجهك تجلسين من ١٠ الى ١٥ دقيقة وبعدها ياسلام ع النظافة 💕✨

اللي ع اليسار مقشر للوجه لطيف جدا وريحتو تجنن بالعسل والشوفان ، 

مرة احبو وخلاص بقي شويتين ويخلص

بس عشان العلبة جاية منتفخة مايبان كمية المنتج الا عند العصر ،، ناسب بشرتي واحسو ينضف بشكل حلو

كاستخدام يومي ، ويعطي نظارة لطيفة ع البشرة 👌🏼

برضو عندي مقشر ثاني منهم بالخوخ ، للاسف ماصورتو لاني نسيتو عن بيت اهلي 

يعطي نفس مفعول الشوفان والعسل مافي اختلاف مرة ، بس انا حبيت الشوفان اكثر 

عندهم انواع كثيييرة مرة ونفسي اجربهم كلهم هههه 

تلقونه في صيدلية اي هيرب وسعره رخيص ،، 💕

سادس منتج والاخير : 

كريم للجسم من سوب اند قلوري

لحضة راح اتكلم عن الريحة ، اوووف تمخمخ بالراس جميلة 

كلها انوثة وجمال ، لما تحطين منه تحسين انك كذا كانك اميرة ههههه 

صدق صدق الريحة مميزة من وقت مايشمونه الناس فيك حيقولون هذا الكريم 

من سوب اند قلوري لانك مستحيل تشمينه عند غيرهم .. 😫❤️

الكريم لطيف ع البشرة تمصه البشرة بسهولة يعطي نعومة وسلاسة 

حبيت ريحتو في اكثر شي ، لانو في كثير كريمات تعطي مفعول اقوى منه

يناسب للمناسبات واذا حابة تدلعي نفسك يوم بالبيت .. يجنن 💕

والي احلى منه المقشر للجسم ، للاسف ماصورته لانه كان مخلص ورمتيت علبته

اشتريت منه قبل يومين وماصورته .. 

يجنن المقشرة يعطي نعومة للبشرة ونفس الريحة كمان بعدها تستخدمي ذا الكريم 

واوووه ع الريحة والنعومة .. اصلا قرب يخلص واكيد حشتري منه ثاني .

تلقونه في صيدلية بوتس او وايتس ..

سعره غالي حبتين بس يستاهل 

المقشر ب ٧٠ ريال فاكرته لاني اشتريتو قبل يومين بس الكريم ناسية والله .✨

في النهاية اتمنى يكون البوست افادكم اول شي 

وحبيتو ، وان شاء الله  ماكون كثرت في الحكي .. 💋💕

اللي جربو اي منتج من ذي المنتجات يكتبولي تحت البوست .. 

والي عندها اي استفسار اكيد ارحب فيها 💕

Hoşçakal ❤️

للتواصل : 

لمشاهدة قناتي علي اليوتيوب اضغط هنا 

الرجاء الاشتراك في القناة ❤️

snapchat : i_iafnan

instagram : i_iafnan

email : i_iafnan@hotmail.com