تعالو نعمل فطور صحي ولزيز | healthy breakfast

صباح الخير والحب والفرح ..

صباح كل حاجة جميلة نقية وطاهرة زي قلوبكم

صباحكم زي مابتحبو :)

اليوم جبتلكم افكار بسيطة وخفيفة لفطور صحي ولزيز

يعتمد اكتر شي على الفواكه !

حقولكم ليش اخترت البوست دا كلو فواكه ^^

لانو انا ماكنت اكل الفواكه الا في ماندر ولا احبها ولا ادورها

وقلت حرام أني امنع نفسي منها لمجرد اني مااحوبها !!

وكلنا بنعرف فوائدها الكبييرة للجسم وللشعر والبشرة ...

فقررت اني احبب نفسي فيها غصباً عني هههههه

وفعلا حبيتها وصارت شي اساسي في اكلي وخصوصا في ثلاجتي

بعد ماكانت تجلس فيها الين تخمج وارميها ^^

المهم اني بدات اول حاجة وفكرت كيف ححبها !

فصرت افكر واحاول اختار انواع الفواكه اللي احبها وومكن اكلها

وفي نفس الوقت تكون خفيفة .. خصوصا للصباح او كـ سناك .

وفي النهاية طلعت بعدة انواع ( توت .. فراولة .. خوخ .. بطيخ .. كيوي .. عنب ..كمثرى )

وصرت اقطعها على شكل سلطة فواكه عشان يسهل علية اكلها

وبعد كده جات في بالي اني احطها مع اشياء ثانية كفطور صباحي

خصوصا للويك اند لما بقوم الصبح وابى حاجة خفيفة ولزيزة ..

اعملها واستمتع فيها وانا بتفرج ع اليوتيوب او بتصفح حساباتي ( سناب ، انستقرام )

وع فكرة : حسابي في دي البرنامجين هذا اكاونتي فيه @i_iafnan

ادري انو طولت عليكم ..

ويلا اتركم مع الذ فطور من الشيف أفنان هههه

الفطور الأول :

اول حاجة اشتريت دا البسوكيت اللزيز ماعرف اسمو صراحة

اخذتو لمجرد شكلو وشفتو عند بعض البنات وغير كده اتوقع انو بالارز او الشوفان

ودا خلاني اتحمس لانو الشوفان فوائدو كبيرة وقلت خليني اذوقو

وامانة انصدمت بطعمو مرررة لزيز ..

بس اذا مو حابينو استبدلو بحبوب الشوفان وحيكون افضل اصلا

اول حاجة كسرتو في الصحن وبعدها قطعت فراولة حطيتها فوقو وزينتها بحبات التوت

ممكن تحطي معا عسل اذا حابة !

انا اكتفيت بي كده .. وصراحة مرررة لزيز خصوصا مع الفروالة اتمنيت اشتريت منو كم حبة كمان

واعملو شاي نعناع معاه واستمتعو بصباحكم :)

الفطور الثاني :

جبت دا النوع من الكاسة وحطيت اول حاجة لبن زبادي وبعدها فراولة وبعدها لبن زبادي

وبعدو توت احمر واسود وخوخ .

ممكن البعض حيستغرب انو حاطة لبن زبادي !!

اللبن زبادي علاقتي معاه جدا سييئة وعشان ماامنع نفسي من فايدتو

احط معاه فواكه وصراحة لزيز ومايقرف ابدا ههههه

بعض ناس مستغربين اني اكلها مع بعض

ومرة حطيت معاه رمان وبرضو لزيز ..

ممكن تستبدلو اللبن زبادي .. بأي حاجة تحبوها : كريمة ، ايسكريم ، قشطة هههه امزح .. اي حاجة بيضا وكريمية !

الفطور الثالث :

استخدمت فاكه وحدة !

زي مو موضح في الصورة ( اوفكادو ، بيضة ، طماطم ، توست )

تعملي بيض عيون في الصاج بس بما اني ماحب بيض عيون فاسويتو بيض عادي

وتقطعي الطماطم والافوكادو واذا حابة تجيبي خس معاه يكون افضل

بعد كدا تحطي قطع الاوفكادو على التوست وبعدها البيض المقلي

وبعد كده خس وطماطم ..

اعملي زي ماعملت جبت فراولة وتوت وحطيتهم كده

كزينة وبرضو كتحلية :)

وبعدها اعملي شاي والافضل يكون خفيف .. انا استخدمت الشاي الابيض

هوا زي الشاي الاحمر بس اخف في الحدة واتوقع منزوع منو الكافين

اشتريتو من موقع اي هيرب .

وبالعافية عليكم :$

اذا عجبكم البوست واستفدتو منو

تعليقاتكم تحت البوست تسعدني ولاتحرموني من دعواتكم ..

Good bey

للتواصل : 

snapchat : i_iafnan

instagram : i_iafnan

email : i_iafnan@hotmail.com